Pem Vialvial Leh Tulai Khovel

User Rating: 0 / 5

Star InactiveStar InactiveStar InactiveStar InactiveStar Inactive
 

PEM VIALVIAL LEH TULAI KHOVEL

By Vungzamuan Valte

vungzamuanvalte buktep

THUMAPI: Mihingte khangthu isuisui chiangin gamlapipi khawng apat pem vialvialte inahi vek sim ua, Britishte kichi ngialhouh German nam khat Angles te ahi ua, Scottish te bel Saxons te ahi uhi. India gamah nidanglai in LAL thupi taktak ana om ngei ua gamdangmi galhang khawng ahi mawk uhi. Aryans kichite tua India gam luahtute nasan Caspean Sea kuamlak vel apat Iran zuan ua, Iran (Persia) apat hong lehlut hiding dan in suikhia uhi. Ei Mongoloid kichite Thailand, Vietnam, Burma, North East India a khosate nasan Tibet leh China gam mun khenkhat apat kituahlut suk hidan in gen uhi. Huite lak ah Khasi, Garo, Jaintia kichite tuampian deuh ua a pau uleng tuamdeuh se hi, hiaite bel Khmer (Cambodia) lamte ahi uh chi uhi. Tua Mizoram, Nagaland leh Manipur a singtangmite i origin uh isuisui chiangun Burma mah tung veve hi, Meiteite tel in. Huchia tenna tumta neilou a vial diandiante bel civilization in khumkha a munhaksa pipi ah koltang in ki-om tittik ta mai hi. Might is right chihdan hong hithei nawnlou a, gamsung gamgi kibawl khia te'n ahon khaukhih kha a, ut leh utlou in i tangkhang ta mai uhi.

Gamnuam zaw leh nektak zonna nuamzaw kidelh tuah kheukhouta a, USA kichi bang European gamkektu te'n haksapi in va luahkha ua, awlawl in gamthupi leh gamchangkang hongsuak thei hi. Huchia Land Of Honey and Wine chihdan a ahong minthang chiangin gam tuamtuam apat mihing simsenglouhte pemlut zungzung mai ua, local mite sangin gamdangmite tamzaw pah mai uhi. Australia leh New Zealand khawng migiloute khumkhawmna dia a belseh uh ahi a, tuni in gamthupi leh gamnuam asuakta a, mihing gam tuamtuam apat pemput in a boh in boh luailuai mai uhi. European gamte ah migrant leh refugee kichi hahlut mahmah mai ua, agamsung uah buaina thupitak pianloh hialta hi.

Huchia mihingte alang lang a ipem kheukhou chiangun gamneitu kichite lungsim ah puaknak huai sakna luangkhia a, SON OF THE SOIL theory kichi khawng piangkhia in RACIAL issue tampitak buaina hong om ahi hi. Germany te'n NAZISM kichi Hitler nuai ah hon pankhia ua, nam sianglou chih khong omsak uhi. Mussolini in Italy ah FACISM huchidan mah in hon pankhia a, Japan te nasan in Facist ideology paipih in nasatak in namdangte nuaisiah ua, gelgawt nasa mahmah mai uhi. Nazi te leh Facist te ideology ahihleh, Dictatorial style a kivaipuak ding, gam neitute humbit ding, midangte nuaisiah a thahchimit ding, racial supremecy chihdan ahi hi. Tulai in USA ah white supremecy kichi nasatak mai in tangkoupih lellel ua, nidanglai a KU-KLUX_KLAN te chituh paisuak zel program omsa khat ahi hi.

GAMDANG MI: Gamdang apat pemlutte khamna dingin dan khauhsak semsem ua, adiakin USA te'n Mexico border apat galtai leh illegal migrant te theihtawp in dalta uhi. Huchipi inle mihing million tampite'n USA lam manoh veve ua, El Savador, Costa Rica, Brazil, Venezuala, Peru, Colombia, Mexico etc apat America lutsawmte duaisan tuanlou hial uhi. Africa apat nektakzonna a haksat luat ziak bang, political repression leh religious persecution ziak bangin mihing simsenglouhte lut zungzung den ahi ua, tuchiang in mawk lut thei nawnlou hial uhi. European gamte ah gamdangmite huatna lian semsem a, gamdangmite population tam hulhul ahihna ah political asylum kichite nangawn lut thei nawn lou simta uhi. Hiai galtai nam tuamtuam te'n a gamsung ua hauhsakna te va koppih ahi ua, kou mohpuakna hilou ahi chidan ahi uhi. Demography kichi, gamsung population khandan leh dinmun ahon et vengveng chiangun patau lou theilou dinmun ah ding uhi. Huaiziakin, Spain, Italy, France, Germany, Sweden, Hungary, Holland, Greece, England leh gam dangdang ah gamdangmite deihlouhna huaise semsem a kiphinna leh government tanpha khek-khiak tupnate ziaka kiphinna huaise taktak tungta hi.

FANATICISM: Religious Fanaticism leh Fundamentalism kichite'n nasatak in gam tuamtuam te kivaipuakna thuzoh zou mahmah mai a, religious conformism ichihdan in gamsung ah gindan leh biakdan kibang ding ahi chihna in nasatak mai in tangkou bok uhi. European gam tuamtuam te'n a ngaihtuah tuah chiangun Muslim population a gintak sangun punghat ahihdan mukhia ua, gamsung a biakdan, paidan, leh khosakdan palsia (palzut) ua amau paidan mah zui tinten ahina uah hiai religious fanaticism kichi douzou mahmah lousimta uhi. Kum 50/60 khawng hongpai lai hileh Muslim gam suak vek zou mawk ding ahihdan mukhia ua, asin alai uh vut tinten hi. Arab gamte ah galdouna nasa mahmah ahihna ah migrants tam thei mahmah mai ua, hiaite a laktut lut uh kisik tentun maidan ahi uhi. Tulel lel in Syria buaina ziakin galtai million 6 lam gam tuamtuam ah kitheihthang ua, Turkey ah million 3 vel om uhi, buai peuhmah lellel uhi. Religious repression kichi ziakin gam tuamtuam apat USA leh Europe gamte ah mihing nasatak in tailut ua, welcome mahmah mawk unchin, tua amau kituisabuak ahita mai uhi.

Judate (JEWS) thuakgimna te ithei chiat ding ua, Judate gam ding bawlkhiak sak ngai top mai ahi hi, midangte toh khosa khawm theilou, amau paidan a pai gelgel mawk ahihna uah Israel a akikulkhum dingmah uleng hikha ding hi, namtel ahihna ding himhim uh kimulou hial hi. Muslimte leng huchidan ahi ua, a omna teng uah tuamtuanse dan a kikoih ahihna uah a zintuntute a dingin ningkitel huai leh huathuai asuak ua, lah, mihing pung hulhul mai ahina uah aloh ngaihna ding thei nawnlou lampang ahita uhi. Leitung pumpi zelsuak ahita ua, kum 100 hongpai lai hileh leitung pumpi a gam tengteng phial Muslim gam suakzou dingdan in aomta hi. ISIS helpawl te'n Syria, Iraq leh Arab gam tuamtuam ah huaisetak in nasepna nei ua, huaite thuak zoulou in mihing maktaduai tampite galtai sak uhi, hiaite a galtaina lam uah khosa den mai ahi ua, ISIS te tuppipen mualsuahsaktu asuak mai uhi, gamdang lak di, gam kek di chihdan ahi hi. ISIS movement pen bengdai zou hile uleng gamkek nasa mahmah dan ahi uhi.

INDIA GAM TOH KISAI: India gamsung kivaihawm danin democracy ahi a, socialism leng ahi hi, himahleh, hiaisung ah Left Wing kichi leh Right Wing kichi om ua, Left Wing te'n bel government kivaipuakdan khekpumlum ding, anti establishment force ahi ua, socialist ideology himahleh huhamtak a kivaihawmna, Marxism kichi leh Communism kichite tangkoupih uhi. Right Wing kichite bel nationalism, patriotism te tangkoupih nasa mahmah ua, old order ichih, society kivaipuakdan khauhtak leh Hindutva Ideology paipih tangpi uhi. A gindan uleh a biakdan uh mitengteng in zuih di, suksiangthou ding, gamsungmi hihna kisaktheihpih ding, past glory re-establish ding chihdan lampang hideuhse hi. Himahleh, India gam pen multi-cultural, multi-lingual, leh multi-religious society ahi a, hattak a agenda paipih hehu theih hilou ahihna ah Development lam mah tangkoupih nasa mahmah thepthup zel uhi. Cow Protection lamah buaina nasatak piangsak ua, India a Pangalte nek le tak thupipen leh a ahausakna thuguk uh zungkarh khiak utla leng ahi maithei. JINGOISM kichi jingoistic taka paipih om nakkhem ua, hiaibel, extreme form of NATIONALISM kichi hi. Muhtheih ding leh, a kilangkhe theithei ding a uangtatna ahi a, ke'n gam ka itpen, kei tuk a gam-it omlou ahi chihdan a uangtatna ahi a, gindan tuam leh paidan tuam neite nuaisiahna, gakbetna leh engbawlna te'n azui naknak hi.

Huchia, khovel abem a aktui bangin a zawl...chia kuate hiam in a tangkoupih pih sungun, eigam lam ensin le, Khasite a dinmun uah kip linlen mahmah mai ua, a gamluahna chiangchiang uh luhum tawhum in humbit zou mahmah mai uhi. 1980's tanin Shillong ah Mizote tampetmah mai ua, Khasite toh buai luihluih thei hialding in tam uhi. Khasite'n awlawl in gelgawt toutou ua tunichiangin Mizote tawmchik omta uhi, inn-le-lou nei sunsunte leng muatsiatsak tupna nei ua, building bawlthak chihchu kahase, a repair ding leltak leng phal nawnlou hial uhi. Himahleh, numei vaihawmna ahihziakin, numei te'n namdang pasal aneih chiangun Khasimi suak mawk ua, pasal te'n gending theilou in kamka heuhou mai uhi. Mizoram ensin le, fanatic mahmah mai ua, nam hihna suang mahmah mai uhi. Right Wing ideology nei ngenta ahi ua, gamdangmite bangtuh ui muh in mu mai uhi. Tiaului gal a a sanggamte nangawn uh bawng hawl in hawl ua, bawng hon bangmai in mankhawm ua tiaului gal ah va koihkhe gige peih mawk uhi. Chakma te leh Tuikukte ninhuai sa ua, gelgawt theihna chiteng in gelgawt gige peih uhi. Gam-itna chituh a kituhkha ua, vaite ngialhouh gamtang sak thei mawngmawng louhial ahi uhi. Champhai ah vaite dawr bawl dingin a kisasek ua, mawk hawlkhial lou in avante uh abat in aban aban in a laksak ua, a bamang gaivek ua, sumdawng theilou in a kik zel mai uhi. Thagum suah phutphut leng aching mahmah mai ua, son of the soil theory zang nasa pen lawi ahi ding uhi. Manipur lam ensin le, Pangal population control zoulou ahita ua, tribalte khanghat lua khawng achi khempeuh sek uhi. Manipurte melma lianpen ding tuh Meitei pangal ahi ua, asung ua kamkei kual mulou uh himaithei hi. Burma te'n Rohingya te a nuai ek ua, khovel in a buaipih kheukhou hial hi, himahleh, hihkhial khollou maithei uhi, Buddhist kulmutte vaisaina nuai ah Muslim te'n mun nei hile uh awl awl a gampumpi luahsuak pah dingdan ahi uhi.

Ei district sung ensin le, bang igenta dia, vaite tamlawta chih himai, i economy amau control....

TULAI KHAWVEL: Khovel kivaipuakdan leh khovel kiheilamdang zelzel te'n thuthak lathak honpuak zelzel a, nektak zongin India gamsung mun tuamtuam ah bu-isep ua i khosa tiltel uhi. India gammi ihihna uah right inei ua, himahleh domicile thu ah Manipur, Mizoram kan inei kei uhi. Khasite gam ah khangtampi khosa mahle, tribe recognized louhte a dingin Tribe Certificate a laktheih kei a, domicile certificate i neithei kei hi. Huchimah bangin, Assam ah, tu in Assam te'n 1971 cut off year a puang in NRC a buaipih san lellel ua, State dangte leng ahon pehkha kei ding kichithei louhial hi. Huchia ism chikhat hattak a ahong pailai in, eiloi i utdandan ua gamtang thei ihi uhia le?

Gamdang ah phalna tellou khawng in i lut zialzial ua, Burma tawnin Thailand ah hihna neilou (document neilou) in aguk agal in ilut uhi, huchin Singapore, Malaysia etc ah sepna ding zongin ikuan khia uhi. India gamsung a i-omdan ua va om maimai theih ahikei a, kibukmang, kiselman angai lai hi. Gam tuamtuam te'n a gammite uh nasep dingteng midang leh gamdangmite'n a sepsak/laksak chiangun pawna lou theilou ua, matsuah ahih chiangun gawtna huaise mahmah mai hi. Kithahna leh kibawlsiatna aom khak chiangin uinou aknou sih a sih khak theihna dinmun ahi hi. Hiaidante kha human trafficking chidan in i paisak na ua, a ut a kuan, a haksat dingdan thei zenpi a kuan, sum tampi seng a kuan teiteite ihihna uah, human trafficking diktak hilou ding hi. Numei naupang kumchingloute khawng sex slave ding a pimang toh kisaite genna deuh ahi a...

MAILAM HUN AH: Tumalam, kum 5 hiam paita in Japan ah Nurse 15000 poimoh chi in thuthang ahong om a, Japante khosakdan ka et et chiangin, private care kichi hahbawl mahmah mai ua, thudik mah hidingin ka gingta tinten hi. Kerala state apat nurse/midwife sangtampitak Arab gam ah nurse sem aom ua, khosakna ah changkanphah mahmah mai uhi. Huchia qualified taktakte bel passport hoihtak nei a work Visa nei a kuankhia ahi ua, government ah record hoihtak aom vek sipsip hi. Meiteite huchilam ah siamna nei sang taktak scientist, doctors etc tampitak foreign ah omkhia ua, huaite'n bel mite bawlsiatna leh gelgawtna tuak louhial uhi. Eiloi inbel itheihna lamlam uingol-gamphut mawk hanga, hiaidan a ipaitouh zel uleh kituisabuak kha nilouh ding hihang.

Saptuam lam leh Christian institutions lamah Gamdang imitsuan lou theikei ua, tampitakte USA khong ah i-om lemlum thei vanglak ua kipahhuai lua chi ni, bangchidan a va omom thei ahi ua, bang document nei ahi ua chihbel kithei bunlou zel hi.

India gam nasan in gamdangmite a buaipih lai in, eiloi igamtatdan uh ki-etthak poimoh sa ing. Zanlam zek a Zomite leh Negrote USA ningkhat a kisual gangangte khawng ahong viral a, hucia refugee status nei a mite gam a va omthei tampitak ki-om ahi chih itheih in kipahhuai bang mahleh, political refugee taktak hilou chih ahon theihkhiak ding uh lauhuai khollou adiam chi ke!

India Government in SKILL DEVELOPMENT toh kisai nasatakmai in paipih hehu lellel a, huai skill tuamtuam te kisin in, huchia skill khat nei in document hoihtak toh gamdang ah sepna ding zong hileng work permit toh lungmuangtak a kuankhiak riahriah theih hiding in um tinten ing. Bihar leh UP apat semi-skilled worker, construction worker/labour lakh tampi petmah Middle East ah sepna nei in om uhi. Lucknow a Passport office imuhkhak chiangin mihing dimlet nawinawi maidan ahi uhi. Banghang hiam chihleh, work permit muhtheihna dingin passport poimoh a, skill nei zawmah ua, huchin human trafficking lamlam hizawlou in kha 6, kum 1, kum 2 chihdan in va kilawh ua, huchia a sepna ua ahihhoih chiangun kum tampipi va sem thei uhi. Dollar a lawhkhia ahihna uah manpha takpi suak hi.

Pem vialvial zawlou in, i omna gam ah kiptakin om kinken le, siamna sinkhia in, gamdang leh mundang ah khamuangtak in government theihpihna toh kuankhe leng chidamhuai ding a, a nahloh leng pek zaw ngei ding hi. Gamdang leh mundang ah nekzong in sepna nei himah le, Nagate bang, Khasite bang, Mizote bang etton ding hoih taktak aom ua, a pianna khua uh taisan louhial uhi. Tuadan in, i khua i tui taisansan/pemsansan lou in, en zong kalbi suan sin leng bang achi dia! Gamdang a khosak kichi zaw, a gammi taktak inlah ahon sim taktak tuan kei ding ua, ahon deihlouh chiang ua sahawl a hon hawlkhe ding uh hiveh aw!

India Gamsung’ State tuamtuam ah nektakzonna ziakin iom kheukheu ua, akhenchiang in gamsa hawl a hawlkhiak ahon sawm pawl bang omsek uhi. South India a thiltung leh tulaitak a Gujarat a thiltungte i ngaihtuah chiangin, son of the soil ideology hat deuhdeuh ding suak hi. Racism leh racial discrimination kichite toh job opportunities kinaichik ahi ua, kou sep di, kou nekzonna, kou hauhsakna etc chidante ziaka pawlammite nelhsiahna uang semsem ding asuak hi. Huchidan hunte ah ka inn, ka pianna, ka gam, ka leitang chihding ineih kisam a, huaiziak in gamdang ah bu-kisep den theilou ding suak hi. Pem vialvial sek mahle, i origin, imel-le-puam, itawndan, pupa ngeina, ikhual-le-tui, igam leitang mah isisan toh belh tenten ahi chih thei ni.