Huchilou in zaw Paite pau hauhsakna I ngainep ahikha ding e

HUCHILOU IN ZAW PAITE PAU HAUHSAKNA I NGAINEP AHIKHA DING E
-Valte Ginkhenpau

ginkhenpauvalte new

Paite pau pen, mi khenkhatte gintakdan leh koihdan bangloutak in, pau hausa mahmah ahi hi. Awphawidan tuamtuam a neih ban ah tenna mun leh mual zil in kammal zatdan, paudan, thansak leh gelhdan kituam zekzek om hi. Kuahiam in amah awphawidan leh gelhdan toh kibang zou lou khenkhatte Paite pau hilou leh Paite diktak hilou bang in a ngaikha zenhouh ding chih lauhuai hi. Paite pau pen huchidan a kho khat pau lel bang a ngaihdan neihkhak ding leng vangsiathuai hi.

Paite Pupa Ngeina Daan Leh A Kizatnate (2-vei Puahphatna, 2013) in Paite minam sung a pau tuamtuam kizangte avek in sawm-le-nih phasak hi. Huaite ahihleh Bukpi pau, Dapzal (Dapzar) pau, Khothak pau, Lamzang pau, Lousau pau, Ngennung pau, Teizang pau, Tedim pau, Tuichiap pau, Vaal pau, Thadou pau leh Lushei pau chihte ahi hi. Hiai teng ban ah khat behlap behlai ka ut a, huai tuh Lamka pau ahi. Lamka pau ka chih pen bel atung a kigen Paite pau tangpite toh tenkhawmpih minam dangte pau kizangpolh gawpta Paite pau chii khat Lamka khopi a khangthakte'n a hon zattouh uh pen ka gennopna ahi hi. Hizahta a tam pau zangtu omna Paite minam sung ah awphawidan leh gelhdan tuam zekzek a om khakleh a lamdang lua hilou ding a, himahleh huai a tuam zekzekte pen Paite pau hilou bang a koih a nawlkhin a a omkhak taakleh huai pen a lamdang hizaw ding hi.
Paite minam sung kia hilou in minam khatpeuh lak ah leng tenna mun zil in paudan leh gelhdan tuam zekzek om thei tham a, tenkhawmpihte toh pau kikop a zatkhawm bang leng omsek hi. India gamsung a om Manipur a teeng Paite pau zangte'n vaite leh meiteite pau tamtak koppih nei ua, Mizoram a teengte'n Duhlian pau koppih nei nawn ua, huchibangmah in Myanmar lam a teengte'n leng amau gam lamte pau koppih nei tham uhi. Tuabang mah in, abiktak a Manipur a om Paite minamte'n naichik a a khosak khawmpih uh minam dangte' pau a koppih uh om veve hi. Huchibang mah in, mi namdangte'n leng Paite pau ana koppih sam uh tampi om hi. A pau-a-pau, a gen-a-gen thoh kia gentaklouh a gelh thoh lampang ah leng tamtak kilaktuah in om hi. Huchibang a pau kilaktuahte pen a kineisaktute ban ah a zang mun leh zang toudente aa hong suak mai ding a; paubulsutna neih ahih hun chiang kia in a kilaksawnna kigen pan lel ding hi.

Awphawidan leh gelhdan tungtang mah gen tou zellai leng i ut ahi. Mizoram a om leh huailam deuh apan Manipur hong lut Paite minamte' pauzat tangpi pen Dapzal pau kichi hi a, Duhlian pau a koppih uh tamtak om in, awphawidan leng Manipur lam a omte aa toh kibanglou om zekzek hi. Myanmar sung leh India-Myanmar gamgi zuul a omte' Paite pau toh Lamka a omte' Paite pau awphawidan kibang kim tuanlou hi. Manipur sung mahmah ah leng khua a tuam dungzui in awphawidan tuam chiat om nawn hi. Bukpi khote toh Kaihlam khote awphawidan kibang sim mahleh kituam zek in, Hanship khote leh Kangkap lamte awphawidan kituam mahmah zel hi. Huaibang mah in, Vangai Tang lamte aa tuam in Sialkal Tang lamte aa tuam nawn hi. Himahleh, hiai a kibanglou zekzekte ziak in amaute chii khat, sa khat ahi kei uh chihna ding a om tuankei hi.

Awphawidan leh pau zatdan tuam zekzekte ziak khawng mah in Gualnam chi pawl leh Vualnam chi pawl om a, Vuite chi pawl leh Guite chi pawl om in, Khupchong chi pawl leh Khuptong chi pawl bang leng om hi. Mi khat in Hangshing chidan a a gelh ziak in Hangsing chi a gelh pa'n kibeh khat hilou ka hi uh a chi thei kei a, Samte pa'n Shamte pa toh ka kibeh kei chi thei tuanlou in, Dousel chi a gelh pa'n Doushel chi a gelh pa beh tuampi ahi a chih a gintakhuai tuankei. Hangzou leh Hangzo kibang a pom theih poimoh hi. Tuabang deuh in, Pathian chih zatna mun a teeng pa'n Pasian chih zatna mun a teeng pa a musit thei kei a, Pasian hiam Pathian hiam chite Paite diktak ahi kei hiam ahi hiam kichih tuah theih hi mawklou hi. Pau leh laigelhdan i chihte pen, a si ahihkeileh a mangthang dek ahih hial keileh, a khangtou hat mahmah thil ahihman in theihsiam tuak tamtak om hi.

Paite pau a kammal ahihkeileh thumal kizang khenkhat en nawn zual leng. Tu khangthak hun ah mi pawlkhatte'n Paite Bible sut masakte a naktak a kizang thumal nih- "tuh" kichi leh "huan" chihte pen 'nalhsakbawl lou' in huatbawl bang ua, paihmang ahihkeileh khekkhiat tum in huai thumalte kizatna ding munte ah thumal dang koih ding zongsek uh bang hi. Thumal khatpeuh a mun lua a a hong kizat zom chiang in bel kilawmkhin khollou pawl omthei mah ahi a, himahleh akallak a zat zeuhzeuh pen apoina om lou hi. Pau khat sung a zaat tuamtuam omte kepbitna hizaw hi. Ban ah, a zatna ding muntak a thumal khatpeuh a hong kizat chiang in kituak mahmah zaw hi. Pomsiam pawl neih theih bang leng pau leh laigelhdan khan hatna ding in apoimoh hun om hi.

Midang leh nam dangte pau laksawnte tungtang bang leng gen nawn zuallai leng. Paubul theih hoih mahmah hi. Lapaute kholdiak bang tuh a bul diktak theihchet poimoh hi. Hinapi in, hiai thumal ahihkeileh kammal pen midangte apan laksawn ahihman in Paite pau ahi kei va chih vek tel ding ahi kei chih theihsiam ding in hoih hi. Koimah ah kuate pau hitaleh mahni aa siangset kia pau zang a om gintakhuai lou hi. Ana omkha bang om himhim hitaleh leng a khangtou hetlou pau khat hi maimah phing ding in uphuai hi.

Apoimoh hun a ahoihlam kikhekna maituah siam a, puanbuk neihsa pen keklet hun neih bang leng khantouhna ding in poimoh mahmah hi. Kikhekna lau a puanbuk keklian nuam lou nilouh a aikohan gamgam gige pen huntawk lou ding hi. Huchibang a omna in Paite pau thupina ding dalkha thei hi. Ei theihna guamkhuk sung tan lel en lou in mualdawn ah ding in khodak chiat ni. Huchilou in zaw Paite pau hauhsakna i ngainep ahikha ding e.

©Valte Ginkhenpau, 2017.