Khristmas thilpiak thupipen II

Khristmas thilpiak thupipen II
By VzSiam

vzsiam new

Sepna hoih huntawk nei a, tangvallai a car a tai tuh mite’ muh in nuamsa mahmah ding, lungkim mahmah ding, kipak mahmah ding in a kilang hi. Himahleh kei khom in lungngaihna puakkhop teek ka neisam hi. Lawmte’ lak a chiamnuih bawl hatpen, mi nuisak tampen, ka dah leh lungkham mahmahnate bang leng chiamnuih suah a nuihpih teitei ngap khat ka hi a, hon galmuhte’n tuh lungkhamna himhim nei lou ding a hon sa uhi. Himahleh kei bel ka lungtang tawng ah kap leh mau in ka omden hi.

Valnou i hihlai khawng a duhthusam toh a tak a hinkhua zatdan a na kikhe mahmah. Tua bang a duhthusam leh a tak hinkhua a hong kikhiatluat chiang in mahni hinkhua ahi bangbang a pomsiam loute a ding in kingaihsiat baihlam dingpi ana hi ngut. Huaiziak khawng mah hi’n teh khenkhat vual phalah kisa deuhte’n zu leh sa khawng zumselna a a zat pahpah uh. Ei a vual englua leng hi loute bawn hinkhua chimtak hun a omleh vual eng vungvung a khosate a di’n tuh hinkhua giktuam mahmah ding bang hi.

Mi bang in graduate zoh in sepna ka hon zong sam a, vangphathuai tak in khat ka mupah vanglak hi. Ka lunglutnalam ahi kei na a muh masaksak chi in ka zom pah hi. Ka hon sepleh ka sepma a ka lunglutlouh sangmah a lungluthuai louzaw ahi chih ka thei semsem a, lah a dang leng zong peih nawn tuan lou in lunglutlouh leh sep touhtouh ka thuah hi. Sepna a kuan ding lin ngongoih a zingthoh tuh thil haksapi ahi. Hinkhua ah kithalawpna himhim a om kei. It ngoihngoih ding zi khat houh kinei leh huai in hin hon kithalawpsak in teh chi in zi peuh ka zong a, himahleh nungak khat leh nih ka hel nung in leng lamzang thei tatak lou in ka om a, houh hinkhua theisiam lou a hing siam loulua khat hi ning, ka it leh ngaihte nangawn toh leng kituak a hing thei lou di khat houh hi ning, chih bang in ka kingaihsun a, leitung ka nintha a suak deuhdeuh hi. Damsung a sep ding ka muh tung a lah lungkim lou, zi leh ta zonna a lah ka deihpen leng kem thei lou, damsung daih ding hiai thil gol mahmah nihte a ka deih bang a lohching ka kisaklouh chiang in hin thaman om le ka sa nawn kei a, sihna bang ka ngaih hun a omthei mawkmawk hi. Neulai a ka thil deih mahmah, nei leng kipak denta ding a ka kingahsut a tamzaw ka neita a, himahleh huaite ah leng kipahna a om tuan kei.

Huchia leitung a lungkia a kikhin demdum a ka omlai in namvai ah leng kithalawpna ding himhim om lou in thusia khat khit khat in namsung a hon buak hi. Talpakte Bill thum ziak in khanlohna khat a hong om a, huai in kigawmna leh thathak lakna hon tun ding i sakleh koilak ah, kikhenna, kimuanmohna leh khat leh khat kithulaklouhna a hon tun a, mahni mimal hamphatna ding a zangkhate’n bel hamphatpih ngial un teh.

AD 70 lai vel a Juda mite amau ukkhum Rome-te’ apan suahtaak sawm a hel hinapi amau leh amau melmate toh pangkhawm, nam it lou, chihkhawng leh thusia-lasia dangdang a kingohtuah vengvung a, galte’n kulh a umbing khepkhuplai ua leng kulh sung a amau leh amau kilai a kithatte bang in ka kimu hi. Kituak lou na nana tuh Rome sepaihte’ a di’n nuai chimih a haksa kei hial ua, a tempul nasan uh a laichipsak dimdem ua, tuni tan in a ding nawn kei. Zanlam zek in a haichilh pawlkhat in Jerusalem ah a tempul om loupi in maitam a doh ua, huai tuh AD 70 nung a maitam kidoh masapen ahi lai ding. Siampu khenkhat in bel a tempul uh tuh a ‘Juda’ hihna uh ahi chih muchian mahmah ua, tua tempul a puuk hunhun Juda a manthat hun hi ding ahi chi in tua tempul puuksiatlouh hamhamna ding in Rome-te’ thuthu in om ua, thagum a helna zongte leng na khouden uhi. Himahleh gam leh nam it tuailai sisan haatte a ding in bel, ‘Galte toh pangkhawm, kithubup na hi uh,’ chihlouh theihlouh mah leng ahi zel. Farisai makai Yohanan ben Zakkai in Judate’ a dia manthatlouhna lampi omsun tuh a sahkhua uh kepbit ahi chih thei tinten in a sahkhua uh humbit teitei tum in na pang a, Rome-te’ tung a thagum a helna makaih Zealotte’n kulh kongkhak a kuamah a pawtsaklouh lai un amah kisih khembawl in a nungzuite’ hankuang in kizawngpawtsak a, Rome sepaih heutu Vespasian’ kiang ah Yavne khua tuh Juda sahkhua makaite’ munpi di’n va ngen a, Vespasian in leng na phalsak hi. Tempul a hong chipsiat chiang in amau pawl in temple tel lou a Juda sahkhua zuih dingdan hon pankhia ua, tuni tan in huai zui uhi. Huaiziak in a langkhat ah Juda humbittu tuh hiamhei toh kipan a galdoute hi lou in melmate toh kigulluk sahkho makai khat ahi zaw. Amah om lou hileh Juda, a sahkhua hi in a nam hileh mangthang ngeingei ding hi.

Ei pawl leng buaipih ding thupizaw hiaizah zouzailai a ei kia kibuaipih khop hang a, a sungthu thei lou lah gam leh nam a na itsam, a na awlmohsam, a na veisamte a dia hamhaihhuai leh lung-aphuai tak ahi. Khenchiang in mikhat-minih lalna ding a kilai tuah lel i batna chiang uh a om hi. Tuma kum 30-40 sung i khangthu uh i sut uleh MLA kheel a gam leh nam vai i sai hun uh omlou a bang. Manipur vaihawmna innpi a talpakte nial ding makai i nei ngei kei. Huai naksang in talpakte’ maipha zong a amai ua kuun popop ngen i hi uh. MLA chin theihna ding in a maikhakha in Zomi leh Paite a zang ua, mipite a hon pei lung-am gawp uhi. Akoi-akoi ah leng lam-etna a om kei. Zomi kichisuk in Paite kichitou lele angmasialna kia toh nna i seplai teng koimah ah bitna a om kei ding. Vaite kichi leng leng nam leh gam itna diktak toh nnasem leng i deih ngahlah kei ni.

Ka neu apan in kei khom in nam itna ka na neihpah vanglak hi. Himahleh tha leh zung seng a kuankhe ngap bel ka hisam kei. Tutmun a it thei lel tuh ka hi. YPA bang ka kisaktheihpih a, ka inn kongkhak uah meihol in lianpi in ka gelh dengdong hi. Kum kua lel ka hihlai, 1993 kum in Zomi namni zang ding chi in Lamka College ah ka sungkuan phial un ka hoh uhi. Huai ni a kipan Zogam-Zomi ka sisan ah a belh a, tuni tan lohtheih nei het lou napi a ka puakgik ana hi nilouh hi. Gam leitang gawmna bel thutuam in ka koih a, a mite mahmah khophawk a, laiguizom hih kiphawk a, luankhawm diamdiam mahmah ka na lunggulh hi. Huchia lam-etna liantak toh ka na ngakngaklai in kua dik a kua moh hiam theihlouh, ZRO bang hong kiphelkhap heelhuul mawk a, a phatuam ding hihet lou napi ka na lainatpih mahmah hi.

Huchi bang a mimal hinkhua hileh nam leh gam vai ah hileh kithalawpna ding khat mahmah leng mu lou a, lungliapna ngen lungliapna ngen ka hon muh chiang in ka hong kingaise deuhdeuh a, sih mai uthuai ka sak hun bang a omthei hi. ‘Depression a chihte uh ahi mai di e,’ ka chisim a, lah kei hial in depression nei ding in ka kikoih thei kei. Himahleh zan teng a lupna tung ah khitui kaizen a kingaihsun a, lungleng a, hinkhua chimtak gawp a ka om chiang in kithah ding bang ka lungsim ah a hong lut veu hi. Himahleh va kithah hial ding haihuailua ahihban ah i nutsiat i sungkuante mahmah leng hehpihhuai uh ahihman in kithat hial ding in bel ka kikoih kei. Ngaihsutna a hong lut maimai in ka koih hi.

Himahleh khuahunte hong kihei a, phal khawng hong bi a, mas khawng bang a hong nai leh mi kipak a alang-alang a phe vengvungte ka mu a, kei lah kipahna ding tuan leng thei lou in thawmhauluatna in a hon tuam a, leitung ka chimtak dedeuh a, ni khat lel leng ka hing ngap nawn mahmah kei a, sih ding ka hangsan dedeuh hi. A tawp in hiai leitung a thasialtak a nungta a, lungkimna mu lou a lungleng lel ding a hin sang in kisikhe vetleh thaman zaw in teh chi in thupukna ka la ek khong hi.

Pathian ka na thei thousam a, nidang in tuh ka lungkham-mangbat tawp in leng ka lungtang tawng ah Pathian in pha a sak bangbang in chithei in ka na om a, dahhun pen in leng lungtang tawng ah khamuanna khat ka nei hi. Tutung in bel huchi bang ding leng a om kei. Thumna in leng a hon panpih kei. Ka lungtang a thawmhauna hon neem thei ding a om kei.

A buaihuai khat omlai tuh bangchi kithah ding? Kikhailup? Damdawi neek? Huaite tuh kithat diak a bang a, melse diak ka sa a, ka uttha a suak kei. A tawp in a lampi hoihtak khat ka hon ngaihsunkhia hi. Ni khat ka LIC laite ka sungte ka kemsak a, amau bel ka kepsak maimai a sa ua, bangmah patauhna a nei kei uhi. Zingkal khat an ne kham ka gari chabi ka la a, pawtkhe di’n ka kisa a, ka nu ka gal-et a, ka muh tawpna hi di hia chih khawng ka ngaihsutleh ka mittui a hong luang zungzung a, kinul in ka pawtkhia hi. Koi hiam a gari a va eksiden a mualliam mai ding ka tup ahi.

Ka taisuk a, khristmas kuan chihmahtak bazar ah mi a tam mahmah a, Lamka muh tawp na’ng chi in lamnawl ah ka khawl a, bazar kaite ka en nilouh hi. Huchih laitak in nuta khat in ka kiang zek a thaulem kizuak a hong en uhi. A mel, kizepna leh a awphawi ua pan singtanglamte ahi uh chih a theihtheih. Naupang pa’n a thaulem deihpen a la gaih a, a man a dawp uleh sangval man ana hi a, a nu’n, ‘Bawi hiai zaw lei zoulou ding i hi. Hiai lei le na naute’ puanak di puak zou lou di hang a,’ chi’n a kikhem ua, himahleh naupangpa a ut kei a, ‘Thaulem na deih penpen k’on leisak di na chihsa eivoi,’ a chi a, a nu tuh a chimoh mahmah hi.

Huchih laitak in ka neulai a ka nu’ hon thaulem leisak ka ngaihsunkhia hi. Kum sawm khawng ka hihlai ahi mai ding e. Neulai in khosak haksapi in na kikhosa a, thaulem hoih deuh bang ei a di’n leng na kikoih lou hi. Kep kap theihna mantawm chikte lel khawng kineizou lel hi. Nute Lamka hoh ka va zuih chiang in bazar ah thaulem hoih pipi ka va mu a, deih theilua ka hihman in ka lungsim a hon kam thei mahmah uhi. Khat vei ka sungte kiang a, ‘Lamka hoh leng ka ut kei. Thaulem hoih ka muhchiah ka lung a gim,’ ka chih ka nu’n thei gige ahi dia, ni khat khristmas kuan Lamka a hoh in ka nget le hihetlou in thaulem a hon puak a, kholai pawt ka tun in a hon pia ua, lam-et hetlouh a tua bang thil thupi ngah tuh kipahna in ka dim a, ka hi heihuai zezen hi. Tua bang a hun nuam hunlui ngaihsun in ka nui heuhuau a, ka theihlouh kaal in ka mittui ana luang hi. Thaulem maimai a kipahna huaizah ka na muhlai om hia chi’n ka kingaihsun dedu hi.

Ka ip ka mai leh sum tamsim ana om a, ka va kumkhia a, va naih in, ‘Hiai hon leisak leng na nu thu na mang diam?’ ka va chih guihleh lamdang satak in a hon en a, a nui tiimtiam a, kei a hon en zel a, a nu a en zel a, a nu’n, ‘Dawng ve,’ a chi a, a hon dawng tuan kei. A min ka dong a, a khua uh ka dong a, a skul kaina ka dong a, a pawlzah ka dong a, kizen tak in a hon gen tiautiau hi. Songtalte ahihdan leh a khua ua mission skul a pawl li simlel a hihdan a hon gen hi. ‘Hiai thaulem k’on leisak dia, na skul kaina di ka hon pe dia, na naute’ van leina di le ka hon hawm dia, na nu’ thu nana man taak di ahi aw,’ chi in a thaulem man ka piaksak a, a skul admission na di teng sangkhat ka pia a, a naute khristmas vanman ding teng sang khat a nu’ ki’ah ka pelai hi. A nu’n lamdang a sa mahmah a, a kisuanglah mahmah a, san leng a hon sang utkei sim a, ka pe teitei hi. ‘Hiai teng in skul ana kai phot inla, hiai teng a bei chia na skul fee di hon thon zel di ka hi. Kei leng hong zin zel ding ka hi. Na khua uh nuam ka sa. Lai hoihtak in na hon sim dia, na nu thu na hon mang di aw,’ chi in ka paisan hi.

Ka gari ka hei a, ka manohnalam zuanta lou in innlam ah nui heuhau in ka kiik hi. Tua nutate tuahpha kisa a hamhaih zezen ding un ka gingta hi. Tutung khristmas bazar a hong kaikhak uh hampha kisa mahmah ding un ka um a, a kua hong tuakkha laizang hi ding ahi ua chi’n lamdang a sa ding uh. Khristmas thilpiak thupitak dongkha in a kisep ding uh. Himahleh thilpiak thupizaw dongtu bel kei ka hizaw hi- Hinna a hon pia uh. Amau tegel va tuak kei leng ka tup va tangtun maimah ding in ka kigingta. Huaiziak in a hon thilpiak u tuh khristmas thilpiak tengteng lak a thupipen in ka sep hi. Sihna delh a kuan in hinna ka va mu hi.

Tua ahihman in ei a dia i hin ngap nawnlouh hun in leng mite a ding in hing le hang leitung ah hinman omlouh ni om ngei lou ding hi. Ei a ding kia a i na hin nilouh ziak a kipahna leh kithalawpna mu lou hikha ding i hi. Tua naupangpa pawl sawm ahih tan beek ka khotuah ding a, huchileh hinna dingsan kum guk kum sagih beek ka neilai ding hi. Sum leh pai leh neih leh lam in mite a ding in i hingzou keita zong in miteng in banglam hiam ah midangte a ding a hin theih na’ng i nei chiat ding uhi. Mite’ a dia hin kisinta ni. Hinnuam. Khristmas Nuambel!