Pathian Thu Kilawmsaktu Dingte I Hi

PATHIAN THU KILAWMSAKTU DINGTE I HI
-Valte Ginkhenpau

ginkhenpauvalte new

Khristiante pen Pathian thu kilawmsaktu dingte i hi ua, a melhemsaktu dingte i hi kei uhi.

Tita kiang a Paul in mimal laithon a khak bung nihna ah thumal tampitak suut tham om a, huaite lak a khat tuh, tang sawmna a kimu, “kilawmsak” chih thumal ahi hi. Hiai tangkal khat sung ah hiaibang in kigelh hi: “Pathian, i Hondampa thuhilhna thu bangkim a kilawmsak theihna ding un, khut ommawh lou in, muanhuai a na hoih tengteng hihlang zaw ding in” (Tita 2:10 –Laisiangthou Version 2.0/Paite e-Holy Bible).

Tita 2:1 ah Paul in Tita kiang ah, “Nang zaw thuhilhna hoih toh kituak thu gen in,” ana chi a, hiai a “thuhilhna hoih” a chih pen a “chidam khristian hinkhua zatdan kawk” a Paul in ana zat hi peuhmah hi. Hun tamtak ah mihingte’n hotdamna i ngahna ding a kibulpatna tanlel ah kihunsak khadeksek a, himahleh khristian i hih nung a i hinkhua zatsiam leh zat dik ana poimoh petmah ahi chih theihchet poimoh hi. Paul in a laikhak dangte ah khristian hinkhua toh kisai poimoh ahihman in tamveitak ana genlang hi. Huchibangmah in, khristian hinkhua apoimohdan ana genna ah Alexandria a om Clement in, “Khristian khat in tuh a hinkhua pumlum pen kikhopna siangthou a kihel den bang a a ngaihtuah ngeingei ding ahi,” ana chi hial hi. Huchibang in kikoihthei gige leng bel kikhial lou tangpi ding mah ahi.

Tita bung nihna pumpi pen a lungluthuai mahmah khat hi a, huai ah tuh upazaw leh naupangzaw khristiante’ mohpuaknate taklat in ana om detdet hi. Tang nihna ah putekte aa ding ana kigen a, tang thumna apan ngana tan ah pitekte leh nupilate (Parallel Bible –Paite/English) aa ding biik kigen nawn a, tang gukna apan in tangvalte aa ding kigen hi. Tita leh a tuailaipihte aa ding a zat ding thute tang sagihna apan giatna tan ah kigen nawn leuleu a, tang kuana leh sawmna ah sikhate (Gk. doulous) ahihkeileh nasemmite aa ding gen in om hi.

Tita bung nihna tang sawm ah Paul in, “Pathian, i Hondampa thuhilhna thu bangkim a kilawmsak theihna ding un,” chih ana gen a, hiai pen sikha-nasemmite aa ding biik a gen ahi a chih theih ding hi. Ephesate 6:5 leh 1 Timothy 6:1 chihte ah leng sikhate’n a pute uh a zah ding uh ahihdan Paul in ana gen hi. Hiai laibute gelh a om hunlai in Roman-te khotang kivaipuakna ah sikhate pen a niampente hi ua, simmoh pente leng ahi uhi. Himahleh khristian hong suak hiai nasemmite’n “sel lou a a pute uh thuthu a om” a, “bangkim a a kipahna ding ua” a om ban ua “khut ommoh lou” leh muanhuai a nna hoih tengteng hihlang” a a om uleh Pathian thuhilhna thu pen kilawmsak hi ding uh ahi chih gennuam ahi. Tuni in suak-le-sal a kineihna om nawn kei mahleh nekzonna ding a kiloh a nasemmite genna in leng a laak theih ding hi.

Alehlam ah, Pathian’ thuhilhna thu pen a tuung apan a kilawmsa, a hoihsa ahi a, eite va gensiam leh phatsiam ziak a hoih ahi mawk kei. Etsakna ding in, Matthai bung ngana apan sagihna tan khawng a kigente bang ei gensiam thu a kinga a hong hoih ding thute hilou in, amah a ana hoih gige khinsa thute ahizaw hi. Ahihleh, bangchidan a Paul in nasemmite’n “Pathian, i Hondampa thuhilhna thu... a kilawmsak theihna ding un” ana chi ahi ding?

“Kilawmsak” chih thumal pen a Greek ah “kosmosin” ahihkeileh “kosmeo” ahi. Hiai thumal hong kipatna tuh “kosmos” hi a, huai bel “chei, tuam, zem” chihna leng ahi chi in Thayer in gen hi. Hiai “kosmos” thubul a nei a Thukhun Thak Laisiangthou a hiai thumal hong kizatkhakna tuamtuamte ahihleh Luka 21:5 (kekosmetai- zepkilawm), I Timothy 2:9 (kosmeo –kivan), Tita 2:10 (kosmosin -kilawmsak), I Peter 3:3 (kosmos –kivatte), I Peter 3:5 (ekosmoun –kivan) leh Kilakna 21:2 (kekosmemenen –kizem) chihte ahi. Hiai “kosmeo” apan in “cosmetics” chih sappau thumal hong piangkhia hi. “Cosmetics” i chih nawn chiang in “zepmawina” ahihkeileh “cheimawina vanzatte” lam genna ahi nawn hi. Huchi ahihna ah, hiai thumal in ei, khristiante’n Pathian’ thuhilhna thu etlawmtak omsa pen “cheimawi, zepmawi beh thei” in “etlawmsak semsem thei” i hi chihna leng kawkthei hi. Gendan dang in gen leng, khristian nasemmite kia hilou in, khristian putekte, pitekte, nupilate leh tangvalte pen Pathian’ thuhilhna thu kilawmtak langsaktu ding leh a zepmawina ding a vanzat poimohte i hi uh chihna ahi. Huai ding in khristian hinkhua om dingdante leh i mohpuaknate uh i theih a i zuih uh poimoh hi.

Kicheimawina vanzatte'n mihingte' etlawmna a latsak sem theih mah bang in khristiante'n leng i biak Pathian' thuhilhna thu etlawmna langsak semsem thei i hi.

Laibu ette:
1. Berry, George Ricker, The Interlinear KJV, Parallel New Testament in Greek and English (Grand Rapids, Michigan: Zondervan Publishing House, 1993).
2. Thayer, Joseph Henry, Greek-English Lexicon of the New Testament, rev. and enlarged. (Grand Rapids, Michigan: Zondervan Publishing House, 1965).
3. Barclay, William, The Letters to Timothy, Titus and Philemon, rev. ed., The Daily Study Bible (Bangalore: Theological Publications in India, 1990).
4. Dickson, Roger E., Titus, Dickson Teacher’s Bible (Hutchinson, Kansas: Africa International Missions, 2016).
5. Cloer, Eddie, ed., 1, 2 Timothy & Titus, Part 6, Truth for Today (Searcy, Ark.: Resource Publications, 2017).

©Valte Ginkhenpau, 2018