Chiindan Kihhuai (Lev 18:30)

CHIINDAN KIHHUAI (LEV. 18:30)
–V. Ginkhenpau

ginkhenpauvaltenew

“Huaiziak in hiai thil kihhuai na ma ua a chiin bang uh na chiin tei louhna
ding un leh huai a na kihihnit louhna ding un Ka thupiak na zuih ding uh ahi:
Kei TOUPA na Pasian uh Ka hi, chi in, chi in” (Levitikas 18:30).

Thumapi:
Hiai atung a i tangteel hoihtak a na simleh Pasian in i chiin ding a A deih louh, thil kihhuai asak om ahi chih amuh theih hi. Huai thil kihhuai chiin louh ding a A gente Levitikas 18:1 apan i simsuk leh chiangtak in muh theih in om hi. Pasian’ mite’ hih ding leh hih louh dingte bel: (i) Pasian’ mite’n namdang a teen khoppihte uh (Aiguptate & Kanaante) hihbang a hihlou a Pasian’ thupiakte a zuih ding uh (tt.1–5); (ii) tanau naite’ vuaktanna leem louh ding (tt. 6–18); (iii) numei anit dan ngeina a anit sung a vuaktanna leem louh ding (t. 19); (iv) invengpa’ zi luppih louh ding (t.20); (v) Molek adi’a mei lutsak louh ding (t. 21); (vi) numei bang a pasal kithuahpih louh ding (t. 22); (vii) ganta toh kithuah louh ding (t. 23) chihte ahi. Hichibang a kihhuai chiindante a tenna gamte un na chiing khinta ua, ana buah gawpta ahihman un Pasian in Israelte kiang ah hiaibang “chiindan kihhuaite” apan kikemsiang ding in thuhilh hi.


“Chiindan kihhuaite” i chih pen New King James Version ah “abominable customs” ahi. Chinzam Tawmbing’s English-Paite Dictionary in “custom” i chih pen “hindan/chindan” chi in let a, “abominable” pen ahihleh “mulkimhuai leh huathuai thuah” chihna ahi chi hi. Huchi ahihna ah Pasian in mulkimhuai leh huathuai thuah hindan nei a hing lou ding a hon hilh chihna suak hi. Hiai atung a i tangteel in “chiindan kihhuaite” chi a agente lak a i lunglutna pipen ahihleh bel numei bang a pasal kipolhpih louh ding chih tungtang ahi.


July 2, 2009 in Delhi High Court in thupukna lamdangtak hon la hi. Huai thupukna dungzui in India ah gay marriages leh homosexuality phal ahi. Huai omdantak bel, akibang-le-kibang (pasal-le-pasal, numei-le-numei) nupa bang a kipawl a om phal chihna ahi a, akitenna uh leng pom ahi chihna ahi. Hiai thupukna toh kisai hong kigelh ka simkhak phet in ka lungtang hon phuzot hial in ka thei hi. Akhangtouzaw gam bangzah hiamte ah phal in na omkhinta hial mahleh India aa ding a ahong tun patna ahihman in lamdang salua ka hi. Sahkhua kulmut tampite tenna India gam a hiaibang thupukna lak a ahong om theih pen thil lamdang lua suak hi. Huchi ahih dungzui in hiai thu in hun tomchik sung mah in khawvel kilchih dengsuak pah hi. Khawvel khangtou mahmah a khawsa hita i hihna ah mi pawlkhatte’n hiai a thupukna uh tulaivai sa in tulai hindan in koih ua, gam khangtoute chiindan hisak in poi sa lou uh bang hi. Khenkhatte’n lah mulkimhuai bang i sa uhi. Huchi ahihna, tu in, hiai ah, Khristiante kingakna pipen Laisiangthou in bangchi a gen hiam chih leh kuate’n hiaibang chiindan ana chiing sek uhiam chih i en suk ding.

Akibang-le-kibangte kitenna leh Bible sinsakna akikalh dan:
1. Akibang-le-kibang kipolhna kichi bang genna ahia?
Thutak khat peuh theihchet theihna ding in dotna chi guk poimoh mahmah om hi. Huaite tuh bang?, bangziak in?, kua(te)?, koi(mun) ah? bangchik/hun in?, bangchi-bang in? chihte ahi uh. Thu hiam thil khat peuh a hiai dotnate dawnna na muhleh bel thudik-thumaan na ngah ding hi. Hiai atung a dotna omte lak ah bang? chih pansan in homosexuality kichi bang genna hiam? chih i en masa ding.
English in “homosexuality” achih theih a, huai tuh zahmoh neih kibangte kideihtakna ahihke’h pasal-le-pasal/numei-le-numei nupa kipolh bang a kipolhna achih theih. Akhenchiang in “sodomy” chih in leng a om a, hiai thumal pen tawkawhuk ahihke’h tawhuk chihna ahi. (Chinzam Tawmbing’s English-Paite Dictionary). Neih kibangte kitenna tuh tulai pau in gay marriages chih in om a, amaute homosexuals ahihke’h gay(s) chih in om uhi.


2. Kuate chiindan ahia?
Court thutanna pen tunai zek in i lak ah hong tung pan mahleh eimite lak mahmah ah leng akibang-le-kibang kingaihna ana om zeuhzeuh a, himahleh heutute chihtakna ziak toh mipite pankhawmna ziak in tunitan in i lak ah hichibang mite zalenna piak ahi tadih nai kei uhi. I gen khittaksa mah bang in Tumlam gamte ah bel zalenna piak in ana om panpanta a, himahleh gam tamzawte’n bel phal tadih nai lou lai uhi. Thukhun Lui hunlai pek apan leng hiaibang chiindan hoih lou ana chiing mi om ahihdan Bible ah i simkha hi.
Genesis 19:1– 11 hoihtak a na simleh Sodom khawmite’n Pasian angelte luppih asawm thu uh na mu ding hi. Sodom khawmite khelhna toh kisai a genna ah Adam Clarke in “sodomy” chih thumal zang hi. Bible in Sodom khawmite tuh Pasian mitmuh a gilou petmah leh khelhna liantak neite ahihdan uh gen hi (Gen. 13:13; 18:20–21). Huaiziak in, hiai chiindan kihhuai tuh Pasian limsakte lak hi lou in Pasian diktak theiloute leh A thumang loute chiindan ahi. Akipatna himhim adik kei.


3. Atuung apan Pasian’ thilgeel tangtak in akalh.
Jesu’n Matt. 19:4 ah “atuung akipan in Pasian in “pasal leh numei A bawl” chi. “Atuung” achih bangchik ahi ding? Marka 10:6 in atuung achih pen “leitung siamchil” gen ahihdan hon hilh thei hi. Hiai thu in Genesis 1, 2 leh 3na a mihing masa tegel siamna leh a tanchin uh hon phawksak hi. Huchi hitaleh, Pasian in leitung A siamtung apan PASAL leh NUMEI na siam ahi chihna ahi. Pasal leh pasal hiam numei leh numei hiam hi lou in pasal leh numei ahi. Pasian in tulai a gay marriages kichi deih hileh akibang lou nih siam lou in akibang nih na siam mahmah ding hi.


4. Akibang-le-kibang kitengte’n Pasian’ thupiak a semsuah thei kei uh.
Genesis 1:28 na etleh Pasian in “amau (pasal leh numei–t.27) A vualzawl a: Pasian mahmah in a kiang uah, “Chi tampi suang ding in hong pung unla, lei luahdim un” chi hi. Pasal leh numei kiten in tup bangzah hiam aneihte lak a khat ahihleh chi suan ding ahi a, taksa utna pichinsakna ding chauh ahi kei. Mihing masa pasal leh numei chi tampi suang a om thei ding in Pasian in vualzawl hi. Akibang-le-kibang kitengte’n amau apan suakkhia tu-le-ta nei a chisuang kithei ngei lou a; thil hithei leng ahi himhim kei hi. Tumalam a Tumlam gam a numei-le-numei kiteng a, azi dan a om zaw pen in ta nei thei lou ahihman a a pasal dan a kineih pen in ta nei mai chih thukizaknate a kigelh na simkhak ngei ka lamen hi. Huaiziak in, hichibang mite’n Pasian’ thupiak semsuah kha lou ahihman un thumanglou ahi ua, atung uah Pasian kipak lou hial ding hi.


5. Thukhun Thak sinsakna in a deih kei:
(i) Rom. 1:26–27 ah “... a numeite nangawn un leng a omdan pianpih uh danlou bang a om ding in a kibawl lamdang ngal ua; pasalte’n leng numei zatdan ngeina tawpsan a, huk in a ki-enlah ua, pasal leh pasal zummoh thilhih in a om ua...” chih thu i mu. Hiai tangkal nih sung ah ngeina bang hi lou a thilhih chi nih i mu hi. Khatna ah, numeite a omdan pianpih danlou bang a om; nihna ah, numei zatdan ngeina tawpsan a pasal-le-pasal ki-enlah a zummoh thilhih a om.
Tang 26na a “omdan pianpih” chi a kilet pen a Greek ah “phusikos” (fusikos chi-a sim ding) ahi a, Thayer’s Greek Lexicon in “ngeina, piandan a ngeina, piandan toh kituak” chihna ahi chi hi. Hiai Greek thumal KJV in “natural” chi a alehkhiak pen Paite Bible a suakthak, tulel a kizang pen ah, “ngeina bang” chi in kilet a, dik in chiang mahmah hi. Paite pau a “ngeina” i chih chiang in “piantung apan chiindan” chihna kawk hi. “Kibawl” ahihke’h “zatdan” chi a tang 27 a kilet pen KJV ah “use” chih ahi a, huaimah tuh Greek thumal “chreesis” chih apan ahi. Thayer in hiai thumal tuh “(ki)zang/mang: numei kipolhpihna genna toh kisai a zat” ahihdan gen hi. Strong ngei in leng “abiktak a nupa bang a kipolhna genna” chi in hilhchian hi. Huan, “lamdang” kichi pen Greek thumal “metallasso” chih apan ahi a, huai tuh “khek, kikhektuah” chihna ahi chi in Strong’s Greek/Hebrew Dictionary in gen hi. NKJV in “exchange” chih kammal hiai mun ah zang hi. Huchi ahihleh bel, “a numeite un leng a numei taksa-utna ngeina pen uh (pasalte’ aa bang nei bang a kikoih/bawl a) kipolhpihna ding a zat ding a khek lamdang uh” chihna suak hi.
Tang 27 in pasal-le-pasal nupa bang a kipolh utna nei om uh ahihdan hon hilh hi. Amaute tuh tulai pau in homosexuals/gay ahi ua; gendan dang in genle, sodomites ahi uhi. Nidanglai a hichibang a akibang-le-kibang kipolh utna nei Greek mite lak a tampi om uh ahihdan Barnes in Romte 1:27 thu a gelhna ah gen hi.
(ii) I Kor. 6:9–10 ah Paul in, “Ahihleh, mi diktatloute’n Pasian Gam aluah kei ding uh chih na thei kei ua hia? Khem in om kei un, kingaihhatte hiam, milim bete hiam, angkawmte hiam, mihukte hiam, tawhukte... hiam in Pasian Gam aluah kei ding uh” chi in ana gen hi. Tang 9na a “tawhukte” kichi pen Greek ah “arsenokoitees” ahi a, Thayer in “numei luppih bang a pasal luppih, tawhuk”-te genna ahi chi. Hiai “arsenokoitees” thumal ngei tuh Greek thumal nih “arsen” (huai tuh “pasal” chihna) leh “koite” (huai tuh “lupna”) chih thumalte gawmkhawm a hong piang ahi (Strong). Huaiziak in, “arsenokoitees” tuh “pasal-le-pasal lupkhawmna” genna mah ahi chih achiang mahmah hi. NKJV in “homosexuals,” leh “sodomites” chi a alehte pen Paite Bible asuak thak pen ah “pasal kizuakte” leh “pasal kingaihna nin a bualte” chi in kilet a, chiang zaw deuh bang hi.
Hiaibang thil nin chiingte Pasian’ kumpigam lut lou dingte ahi uh chi in Paul in gen.
(iii) I Tim. 1:10 ah Paul mah in, “...kingaihhatte khawng a ding, tokohuk khawng a ding, mihing gukhat khawng a ding, juauthei khawng a ding, kichiam khemkhem khawng a ding...” a Dan bawl ahihdan agen in hiai tawkawhukte tuh dan kalhte ahi uh chi hi (t. 8–11). Hiai atung a tokohuk achih a Greek ah arsenokoitees mah ahi a, I Kor. 6:9–10 a kizang toh kibang hi.

Thukhitna:
Mi pawl khatte’n kipolhna (sex) pen akipawl dingte ngaihdan leh kithukimna lel a kinga (consensual) dan in koih maimai uhi. Kipolhna in tup leh ngim hoihtak aneih ban ah gah hoihtak pia hi. Huaiziak in, mihingte pen gamsate bang a ut-le-dah a mawk om maimai thei maimah i hi kei uhi; aziak bel ahing gige hu/kha neite (Gen. 2:7) i hihban uah thukhenna in i malam a hon ngaklai ahihman in (Heb. 9:27).
Kitenna leh kipolhna toh kisai a “piandan a ngeina/thilchiin” ding a Pasian in “pianchiil apan” ana bawl tuh “pasal leh numei kiten/kipolh” ahi (Mtt. 19:4; Marka 10:6). Himahleh Rome khawte’n bel “piandan ngeina banglou in” hukna toh kisai in lehbulh vek uhi (Rom. 1:26–27). Hiaibang mite pen zawlnei Isai in “thil hoihlou thil hoih chi a, thil hoih lah thil hoihlou chi zel a, vak mial a ngai a, mial vak a ngai sek a, thilkhum thilkha a ngai a, thil kha thil khum a ngai sekte” (Isai 5:20) chi a agente lak ah telpha ding uhi. Pasian tuh Amah chihdan zuihna ah kipak a, himahleh Amah chihdan nialna ah thangpai hi (I Sam. 15:22,23).
Azekai luatma in daal inla, nial in. Ahuntak a khuibit pah in asiatbeh thei dang sagih humbit ding hi.