I POIMOH UH - LAMKA DISTRICT

User Rating: 4 / 5

Star ActiveStar ActiveStar ActiveStar ActiveStar Inactive
 

I POIMOH UH - LAMKA DISTRICT
By Lawm Tangpua,
Pearsonmun | This email address is being protected from spambots. You need JavaScript enabled to view it.

Apaita 31st August, 2015 in Manipur Vaihawmna Innpi in ei Taangmi te adia lauhuai bills 3 te pomna a neih utoh kiton in Lamka leh a kimvel ah tua bills te paisuak ding deihlouh kiphinna ziak in kuangzak ngal hi. Hiai toh kisai in Salpha mi 9 te hinna laksak ahihban ah damsung poihlong ding liam leh bai tamtak ki-om hi. Hiaibang a hun haksa, beidong leh hamhaih a i omlai in, a pe dingte'n leng theikhol leh kikup khawmna neikha uhiam chihtheih hial leh thakhat petmah in Manipur kumpi in 8th December, 2016 in District 7 thak lik-lek hon bawlkhia uhi. Hiai hunlai a hamhaihna a dim i hihman un tua district thak te tungtang leh i dinmun ding uh ngaihtuah man omlou ki hipen ding hi. Himahleh, tua district thakte'n kawkmuh leh sinlai hoihtak ei Zomi te honpia hi. I maban leh tulel a political demand i neihte uh siksan masa leh kipatkhiak na(launching pad) ding, khovel pumpi a i gam tak tak leh namdang in inntekna hong sawk theihlouh na ding mun leh khovel om sungteng a milip hi'n bangteng a i tungnung leh a sahpen i hih gige na ding LAMKA DISTRICT tu le tu a ei Zomi te poimoh masa ahi chih hon sinsak/kawkmuh ahi.

LAMKA DISTRICT koimun ah? Tulel Lamka (Churachandpur) District ah Non-Naga singtangmi te ki tengkhawm hi. Unau i hih uh phawk in thei mahleng, Unaute om dingdan a omte ki hi mawnglou hi. I omdan uh tungtawn a sinlai honpiak bel, unau/suangtu khat kichi mahleng lungsim tak a kichimat na(emotional integrity) nei nailou te i hi. Tuaziak in, i luahna leh omna mun chiat a lungmuang, thoveng, ki-thutuak leh neitu hihna toh i puah ding gamgi kichian tua i Churachandpur District apan LAMKA DISTRICT bawlkhiak ahi. Hiai, ki lak-neu na hilou in kilaksiang na hizaw ahi. Midang leh Namdang te neih ding leh neihzah i ki subuai sak keidia, i poimoh i nei hia? i bit hia?chihte i poimoh ngaih masakpen uh ngaita ahi. Tulel i dinmun ah zaw Gam etkai zohlouh enlah a i hun mangsak lou in, i muh-phak, sik-phak leh lungmuang tak a i omna gam mah ahi i poimoh phot. Banghiam thawm leh husa omteng a Khopi/District khat sunga Line of Control(LoC) om in i hihna uh genchiang mahmah hi. I khangthu leh i tulel dinmun uh et in i tulel LoC uh a hiden(permanent) ding chihna omkei a, ki suan thei gige ahi chih i manghilh ding uh lauhuai hi. A gam lei-pek lian khiaklah ziak a -ki tuaklou, ki-ngeng leh ki nangtuah dia tengkhawm sangin ei omna chiat ah district tan bek in kivaihawm tuam leng thoveng, nuamzaw leh khantouhna i maituah ngei lam-et huai zaw hi.

Ei Zomi te'n Politics ah thil chiamteh tham ding thil thupi leh khangthu sut theih ding bangzah hiam i na neita. Himahleh, a tak tak a i gam chih ding, i ngetna mun ding kichian tak ngial leng ki neilou hi. I gam leh leitang, i tenna leh khosakna na ngawn eite'n i gam ahi chi a lungmuang pih theih nawnlouh ahi chih kiphawk phing hi. I ngaihtuah kik chiangin ei Zomite'n leitang kichian, District tan bek a na nei kichian hileng Government a nget i neihte - 6th Scheduled, Separate Administration,Territorial Council(TC) leh a dang dang te'n tuasang in ma a sawn zaw diam chih ut huai hi. Aziakbel, Political demand or Solution om theihna dingin Demand area kichian neih a, tua a teng mite(stakeholders) pompihna a lou theilou ahi. Tua dingin tu dinmun ah area kichian tak tak i nei mah hia? Tua i gam leh humbit i sawm a teng mite i kalsuan ah i ki tawsawn hia chihte ngaihtuah na a i paisan louh ngaita hi. _Tua Lamka District i genpen kuapeuh in Political solution dan a i ngaihtuah ding hilou a, solution om theih leh baihlam zawkna dinga a kalbi ding hizaw ahi chih phawk thak ni._

Lamka district in Political demand i neihte toh ki-kalh khakna neilou in a siksan ding hizaw hi. Tulel a ei Zomi te'n Political aspirations & demand i neihte uh- Territorial Council(TC), 6th Scheduled, Separate administration leh a dang dangte muhna dingin Danbupi(constitution) sawkkha leh GoI toh kisai hi tangpi hi. Himahleh, district bel political demand hilou in, State government thuneihna liuliau toh vaihawmna nuamzaw(administrative convenience)ngimna a bawlkhiak hilel zaw ahi. Ki kalh hilou, ki poimoh tuah himahleh i DISTRICT ngial leng nei nailou hizaw i hi. Tuaziak in, kuapeuh ngaihtuah na neithei chiang in i deihziak hilou, i poimoh uh ahihziak a LAMKA DISTRICT adia i pumkhat uh poimoh masa ahi.

_Lamka District bawlkhiak leh a min mai mai a i lungkim ding uh hilou a, poimoh banga gamgi kichian bawllem na hun a i zat ding uh leng ahi._ Hiai ding toh kisai in i Unaute toh kitheisiam a panlak khawm ngai ding hi. Ei Zomi te nam lian leh piching i hih bang un District ki bawlthak te tungtang deihlouh na awsuak bangmah omlou in i kipahpih a, i unaute'n leng honna kipahpih uh a mohpuakna uh ahi. _Ei luahna gam leh leitang mah humbit leh ei khut mah a kem ut i hihman in Thanlon sub-division teng Lamka district huamsung ahihding alou theilou ahi._

I deihpen leh tup pen Lamka district a hikei hial ding, ngaihtuah leh phawk inleng i na neikei maithei hi. Himahleh, tulel i dinmun ah i _deih_ koihkhiak phot a, i _poimoh_ i neih hun hita hilou hiam! Hiai dingin i kuapeuh i pangkhawm ua i hihtheih chiat ah chihtakna toh phukhawm leng lohching ngei ding i hi. A pil leh siam Zomite'n i ngaihtuah thak ding ua poimoh mah mah ahihleh deih genthei dinmun i hi hia? ahihkeileh i taksap ngoih ngoih nei nailou? chihte ngaihtuah thak a i _Gam maban ding nalh leh kilawm mah mah ngaihdan kia a hunsak lou a, a masa ding te masa sak theichiat leng gahsuah baih pen ding hi hang. I poimoh taisan zen a pil leh siam te hilou in, i siamna leh pilna tungtawn a i poimoh thei leh semte hihsawm chiat zawni. _ Hou leh neu i sakte te nasan i neihlouh na in nampi kisa sim mahleng i hihna hon su lang mah mah a, singkung lianpi kipatna leng atang(seed) neuchik ahi chih i phawkthak a, neu i sak himahleh poimoh pen ahihziak in kuapeuh in LAMKA DISTRICT poimohna theikawm a kal i suan uh i poimoh uleh a lou theilou ahi.