A, Aw, B, Ch helo mai himaleng.....

User Rating: 3 / 5

Star ActiveStar ActiveStar ActiveStar InactiveStar Inactive
 

A, Aw, B, Ch helo mai himaleng.....

- John Suantak
johnsuantak

Tulai khang a ding in vang vangsia mai ka hi puai... A, Aw, B, Ch helo – gualphalo gual mai ka hi. Kenle ka khangualpi, ka liangko kibatpite gual in, naupang neu chacha te’ gual ah lekha kiziak leh simthei ka lunggul ve khawpmai hi. Tuhin vang kum 40 val lam mi ka hitai.... lekha henuam in zil nuam maleng, insung haksat ziak mai hilo in, ka thuak leh ka kum inle a tit ta mamalo a hi. Mi enna hinkhua mangzo mai di ka ta diam?

Mihing khat hina dawl leh nungak khat hina dawl in kawppi ding pawsal ka dawive sam.... Kei a ding ah lemguat a vang ngei..... Himaleh, siamtu in a siamsa thawn in a kawi puai ti chetna dingin kawppi pawsal hawitak khat a hung piai. Ka mitmawna hiatmil leh paimang hitan ah ti’n lungmuanna khat leh kipak gukna khat kanei hi. Aziak chu, Pathian in gil-ah-ga gochan malsawmna cha pathum hial le ei piai. Himaleh, ka kinepna leh suangtuana chun sawt a dai diak puai. Musitna leh simmawna ma chun panthak la hileh a kilawm a, zia chu thûk leh khawk diak ding ahidiam?

Mite chun, thiamna zat chuamchuam zil ah, zi-leh-pawsal nei a, hinkhua nuamtak siam ding lunggel leh tup ah nei in, zia a lungtup dungzui un zi-leh-pawsal ah kinei in insung a la siam ui. Kenle zil leh thiam hilo maleng insung siam lunggulna kala neitho hi. Maleh kei a dingin vang, mite nawpsakna, kei a ding ah chun vangsiat kibelapna mai ahizawi. Keima pianpi mitmawna bangma umlo maleh, insung haksat ziak a khawvel pilna ka la zil zawlo; A, Aw, B, Ch kala hiatlo chun, ka insung siam sung ngei ah - ka pawsal, ka talpi-talpu, khawtang leh kochuam natiang ah simmaw leh musit kahi ziak in ka ngai mama ka vawnchawite na tiang tawhle umkhawm sawt theilo ding ah nawl kala hizel mai hi.

Thingtang apat zia khawvel vâk hi mu in, ka seilian a, unau tamtak lak ah numei pakhat ve kahi tilo keima chanchin gen belap ding a um puai. Nu-leh-pa mawl leh khawsak haksatak etkawlna nuai ah hung seilian in, lawi-leh-paite’n maban ding sautak mulawk ah thiamzilna school haw a zawt lai un kei leh ka suapite’n vang, zingkal nek ding hawl ah sêng leh namkhau tawh lo lam ka zuan zel mai ui. Ka septheina kham ua hiatthiam law bek changlo in, nawl leh mite phatchuampi kham hilo ziak ma in nawkvel, simmaw leh gensiat chu ka tuak zel mai uh a hi.

Thiamthu gentheina hun natiang le piak hilo a, damsung a ding ah tia muangtak ah kala nei ka pawsal leh khawvel ah ka ngaitua leh ka hinna hial kala chânpi ngam ka vawnchawite pathum tawh kimu thei talo ding ah khen ah ka um mai vang chu - anai aw anai ti thumal bep inle genzo puana. Panpitu kanei pua, ka dikna gentheina ding a hiatna le ka nei diak puai. Kei migenthei a ding a chun hausa, bawlthei leh neizo te thugen leh ngaidan zosia chu khawvel ah kizui gual mai in ka kawi mai hi. Ka hinkhua vang khawvel ah kinepna himhim umtalo, a bei tawh a kibang tai. Insung ka siamna, khawtang leh kochuam ah nawdaw, mawsak leh simmaw tilo kei a dingin khekchak bangma a um ta puai. Kinepna bang ken kanei nalai diam? Khawvel ah kei a dingin hin man a um nalai em? Pakhat chale a um ta puai.

Khawilam zuan a, bang gual ah nek hawl ah ka hinkhua mang nalai ding ka hem? Thi mailo kei a dingin ah kinepna bang a um nalai em? Panpitu ding kuama ka nei pua, dikna nei ka hem, sual ma ka hem ahiloleh Pathian lemguat a hem kahezo puai.

Gilkial ngawingawi a, beidawng tak ah ka umlai in, ka neulai ah mite gen ka hiat - mizosia te lungsiat Pathian ahi ti a gensek uh ka geldawk ah. Zia tiang a chunle, kinepna taktak kanei thei puai. Himaleh, ei siamtu Pathian in ka ginna hatlotak himaleh hung kantha in ka hia, A, Aw, B. Ch helo maleng Pathian dawigual ah ginumna, titakna nei phawt leng lampi ama’n ei siampiak ngei ding ahi ti ka ngaitua dawk hi. Bangti kawngkawng a hem in hat ka hung la thak thei a, seki-makhai ziang mai hilehle lamdawk thei dingin malsawmna ka hung dawng hi.

Khawvel khang hat zing ah, keima pianpi pau helo leh ziak leh sim natiang hitheilo, nuthawi leh pampai ah umnu hi Pathian in ama dawidan ka chiapi ziakin ei malsawm a, mite lungsiatna leh dawisakna ka chan chuh kiletsakna manglo in, Pathian chawihawina leh ama a ding ah ginumna ka mang tai. Zia kipat a chun Pathian in malsawmna hungpia in, A, Aw, B, Ch helo himaleng Pathian malsawmna dawngtak lak in ka pangpha ta, midangte natiang panpi leh malsawmna a dawntheina ding ua tilkhotu ka hithei tai. Pampaitute leh nawltute bêl tak ding ah siam kahi tai.

Khawvel thiamna, pilna haw leh Christian hina pauchap leh kikhawp bep pawimaw hilo in, a setawp khawk I tuak a, genthei tawpkhawk I tuak hun ah le Pathian dawigual ah ginumna I nei ahileh malsawmna dawn a kikhello ahi ti ka muchian hi.

(Inspired by a true story)