Ka Kum Sawmthumte

User Rating: 0 / 5

Star InactiveStar InactiveStar InactiveStar InactiveStar Inactive
 

Ka Kum Sawmthumte
By VzSiam
vzsiam new

Mi kum zakhat damte’n bawn a kum zakhat uh gen a gelh le kuul sa khollou ua, ei kum sawmthum kia phapante khawng in huai ei kum tawmchik va gen di le kisaklahhuai sim tuh bang. Ahi a, mihing i tuam dungzui a gen ut a sa ut deuh bang le om tuh hi. Khenkhatte bang in sepna a muh uleh thukizakna a tuang dengdang uh. Promotion a muh uleh houh bawng e sial e gou uh. Ei bang tuh uang gen le sepna i muh a i va join hial tak a sungte’n sepna mu hihlam hon thei pan uh. Promotion i muh bang a mi’ kam apan ana za un chin, huai a theipan uh. Promotion khawng news a a hong kisuah chia le ut leh utlouh genlouh a na va simkhak hamtang bang in hiai le sim hamtang in.

La ngaih mahmah vansawltakte’n a sak theihlouh uh a chih zezen utuh, ‘belamnou sisanpha’ ahi, chih dandeuh a ke’n tuh, ‘Mim bang pianna Zogam nuam,’ chih la ngaih mahmah sathei ngeingeilou ding. Zogam a kipianglou maimah a hihchia. Himahleh Assam gamtawng zou nawng lak a piang a kihihman in zougam a piang tuh kihi veve. Huai in zougam itna a hon guan veve hi in ka thei. Sangkhat zakua sawmgiat leh nga phalbi sukpi lai a kipiang ahihman in kum sawmthum vaal tuh leitung ana kipal samta hi. Hiai kum sawmthumte gam itna mit in leh et kiik leng ut ka hi nengnawn ve. Bang hiam pilhuailua suutkhe dek tuh hi zenzenlou. Mi taangpi khat in a muhdan hon gendek hi nengnawn in chin.

Bung thum bang a khen hileh a bung khatna tuh a kum sawm masate ahi. Huai kum sung in Assam singtang dawn apan hong peemkhia in Lamka apan meel guk ding khawng a gamla Geljang khua ah ka hong teng uhi. Tulai hi nailou deuh ahih chiang a ling kimawl, kangtalai a tai, aipithau kap, vok zunbuh suih chihte bang kihahbawl pha mahmah lai. Himahleh a kiamlam tuh ahi peuhmahta. Hiailai a ka mangngilh theih hetlouhte lak a khat tuh YPA Raising day a di hia ahihkaleh Zomi Namni a di hia chih ka thei chiang nawnkei a, Zangta la khat cultural troupete’n zil uh hiveh aw; Geljang a Convention skulpu a om phamta Pa Tualchinpau’ phuah ahi achih lamtak uh ka thei. A zilna khawng ua va ki-omom tuh hi peuhmah di, vual khat ka va thei vevauh a, tuni tan ka bilkha ah a mangkei – Zuangthou dih vaw PNC aw i gam dougal gimsi bang lang e- chih ahi a, sangkhat zakua sawmkua-le-thum lai vel hive'n, bang gim ana za a hiai bang ana phuak ade aw chih ka ngaihsun khanak.

Hiai kum sawm masa sung in naupang chik himah leng kei khom in gam leh nam ka na ngaina pah a, ka innkong khak uah meihol in let a lian in YPA chih ka gelh dedaw hi. Sangkhat zakua sawmkua leh thum kum a Zomi Namni lawm ding chih hong kithang bang tuh a thu maimai le thupi kisalua. Zomi namni flag neu tetauh gari khawng a taak uh hive’n, gamlak a kawlsuangpua garite khawng in hon taak un chin, lou lampi kho kituak, thupi kisa mahmah maidan hi’n. Huai kum Lamka College huang a Zomi Namni kizang hi ve’n, ka innkuan phial ua va hoh hi in ka kithei. Khochih a di gari hon sawl un chin, khak le hong kha uh.

Huailai a tuh thupi kisak luat a om, Zomi khawng hon chih chiang ua thupi peetmah a kikoih. Mi’n hon ukkhum ua a thunuai ua hon koih uh ahihlam le kithei khollou. Naupang hon khosung leh khonawl a ut dandan a vaak a gamta, khavak nuai kho delhte peuh kimawl a zalentak a i om bang a i nam leng zalentak a om ding ana kisa. I gamsung na nana a ei deihdan a vaihawm a khosa a, nam dangte’n leng hon zahtaak a hon thulaak ding uh bang ana kisa. I khosung a Meitei-te bang ei thuthu a om chih bang phial hi ve un, kisimmoh hisim maimah. Makaite bang kimuanglua, kingai thupilua, Israelte’n Mosite leh Joshuate a muh bang ua mu kihimaidan hi’n.

Tua bang teng ziak in hiai hunbi masa tuh Theihkhelh Thupina hun ka chimai hi.

Kum paizel chih mahtak a kum sawm nihna ka hong luttou ta hi. Huai tuh sangkhat zakua sawmkua-le-nga leh sangnih-le-nga kikal ahi. Hunbi deihhuai ahi hetkei. Hiai hunbi hong luttou panpan Kuki gal in a hon nawk a, neih-le-lam teng Moreh ah ka va nusia uhi. Mi dangte’ taan toh teh in bel bangmah ahikei.

Geljang a ka tenlai un Thahdoute toh lai ka simkhawm ua, ka kithuah ua, huchi den didan in ka koih mai hi. Sangkhat zakua sawmkua-le-sagih kum bul a Moreh ka va tunsuk in leng Thahdou lawm ka va nei hi. Huchi touzel di i sakleh ana hidekkei. Gintak sang a melma ding na tamzaw hitah e chih theihna leitung ah ka hong khanglou a, khanlohna kipahhuai tuh ahi peuhmahkei.

Nisim in theih beh ding thil om a, tuate lak ah kipahna ding a tawm mahmah hi. Tatna peuh a gaal thei ding a tamdan khawng, heina peuh a hon nang thei ding a tamdan khawng theih behlap in a om a, a guk in ana kipawna mahmah tentan sam hi. I tenna gam leitang khawng ei thu a a omlouhdan, namdangte’n a utut ua hon pei thei uh ahihdan bang phawkkhiat in a om hi. Meiteite’ thuneihna bang theihkhiat in a om a, patauhna kha in a hon man hi.

Huaiziak in hiai hunbi tuh Khanlohna Lungdonhuai ka chilou theikei.

Himahleh hichi bang hun khawng a dia Zomi keinei mah hive’n chi’n lung tuh muan khat in a muang hi.

Huai bang khamuanna toh hunbi thumna ka hong luttou hi. Huai tuh sangnih-le-nga leh sangnih sawm-le-nga kikal ahi. Himahleh Zomi pen deih bang in mipite’n paktalou phiing ka sa hi. Mipite’n iplah leh ningkitelhuai sa uh himaimahleh kilawm in ka thei mawk hi. Hiai pen makaite’n nahoih sem napi a mipite’n a theihsiamlouh ziak uhia ahihkaleh makaite mahmah in leng nampi a ding a nna ana sem gina phalou mah uhia chih bel ka theikei. Kholak mipite’ lungkimlouhna ka thei lel hi. A kal in sungthubuai bang hon nei zezeuh zawmah ua, a guuk in lung ana gim mahmah sam hi. Huchi a bangchi maimah i hi di ua aw chia guuk lunglelh sim lai in sangnih sawm-le-nga kum a hong tung a, Lamka a hong kuang peetmah hi. Sangkhat zakua sawmkua-le-thum kum a Lamka College mawltual a Zomi vaidawn a khutbeng damdamte’n kum sawmnih nung in i hal khu lunglung uhi.

Hiai sawng a thil tungte i nam leh gam a dia hoih deihna ziak liauliau mah a piang ahi diam chih ka ginlelh hun a tam hi. A ziak bel Lamka pansan a simleivai kisai himhim mahni angmasialna lou a kisai muh leh theih ding om ngellou hi. A om sunsun bang in leng sawt daih hetlou hi a theih in om. Revolution tung a revolution nawnsawn bang poimoh hileh kilawm i bang maimah uhi. Huchi in hiai hunbi nanung ah tuh hunbi masa tegel a khamuanna leh kimuanna ka neihte tengteng bulbaal neilou leh kinngakna taak ana hihlouhdan ka theikhia hi. Huchi’n lam-et ding bei in hunbi lina ka luut hi.

Huaiziak in hiai hunbi tuh Chipsiatna Hunbi ka chi utmai hi.

Huchia thazoi tak a hunbi lina zangtou dia ka kisak pat kiangkiang leh nambing tuailai kipawlkhawnte bangzah hiam in ZYA apan kizuukkhiat a hon sawm tehtuh zel uhi. Hiai hiangchiang in tuh hamhaih gawp le ka hisim hi. Nampi a ding khualna hia ahihke’h angmasialna hia chih dotna dotlouh theihlouh ahi zel hi. Nambing tuailai kipawlkhawmna bei leh bel President leh Secretary tampi nnabei suak ding uh tuh hi peuhmah. Kei leng nidang deuh in conservative i chi zenmah hiam ah khat ka na hi sam hi. Pi-le-pu’ tawndan a man hiaihiai khawng ka pawna a, huan ah pau luite pampaih a om a kholaipau khawng i top zelzuul khawng uh ka na zadah sim hi. Biakinn khawng a thugentu naupang deuh khawng in ‘ei chu’ khawng hon chih tehtuh chiang khawng un ka naa a om sim mahmah. Himahleh tu chiangchiang in bel khovel ah thil kikheng ngiitngeet a, deihkei leng lah khaam theihlouh, deih law lelah noh theihlouh, ama ziazia a kikheek ahihdan limtak a ka sui chiang in thil a hi bangbang a pomdan ka hong siam hi. Thil hoih hia hoihlou chih bel ka theikei. A tawldamhuai mahmah chih bel ka thei hi. Huaiziak in YPA leh adangdangte bang leng subei ni in ZYA mah ah om ni a chih uh leh leng pammaih sak ding in leng ka koih nawnkei. Ahi a a pom thei bilbelloute leng mohsakhuai ahikei uh. I pianpih thil himhim paihkhiat ding thil haksa mah ahi. George Washington-te' hunlai khawng in Negro-te toh dinmun kikim a om ding chih mikangte a di'n thil omthei ahikei a, ngaihtuah phak leng ahikei. 'Thil himhim i muh phak ma in a haihuai vek...' ka heutupa Lian Samte in facebook comment ah a hon chi kauh a, diklaw sim. Huaiziak in a muphabante lah haisakluat ding hikei, a muphaloute lah iplahluat ding le hisamke'n teh. Thil tengteng lak a a khawk leh poi sukha pen sahkhua nangawn i kheek theih a, namdangte’ hon puak sahkhua bang tu a sihpih ngam a i pomtheih leh huai Paite chih koih khiat a Zomi pom ding haksa ding in ka koih hetkei. Paite nuai a Lamzang, Dapzal, Bukpi, Val leh a dangdang kituamhuilou a a om tiptep dan a Zomi nuai a kituamhuilou a om tiptep theih tawk di hi vaw. Baihlam law di pi haksa law di’n i va geelkha a ahi diam! A haksalua mah houh hia leh admin pu? Khaih! Theihzoh le naak omlouh.

Christianity hong lutlai khawng suut in i nei ngei di uam ah. Miteng in ana pakta popop hetlou uh. Hausa leh upa tampite’n na deihlou in dou chihtak in na dou uhi. Dou ding mah leng ahi. Eimah pipu’ tawndan nuaimit dia hong kisa tuh pahtakhuailou ding mah ahi. Guite innpipa Pu Kamzamang bang houh Hanship a a lutlai hive’n, dou chihtak in a dou a, ni khat ngial biakinn sa a omte mautawn gawp zen in a va saat hi. Himahleh bang chichi hiam in i na pom a, tu in a khang thumnate christianity sihpih ngam khang i hita uhi.

Tua mah bang in Zomi chih bang leng hoihzaw hitah chia i pianthak naakleh pomhak sim lele tua i pomna sang a pomna thuukzaw in pomsuk guap leng den chia khang hong omte eite’n Paite i sihpih ngam bang a Zomi sihpih ngam hong hita ding uh ahi. A government toh kisai a a technical thilte le huchi buaihuai law di’n ka sepkei. I min, i khomin, i vengmin natan nam dangte' min a i kheek nung a vaal, a omsun teng bang pammaih luatna a omnawn tuan a ahia? A Paite pau pen kem siangthou zou hi lele thukhat. Tua i Paite pau lah i pute' Paite pau toh le kibang nawn luhluhlou. Pau i chih khawng hichia kikheek tou ngitnget mah ana hi. Sappau bang le Shakespeare-te zatte khawng i theibun nawn sam a maw. Paite sihpih ngap, Vaiphei, Zou, Simte sihpih ngap khawng a hih sang un khang hong om dingte Zomi sihpih ngap hong hile uh tua i latkhiat (sacrifice) uh thawn hetlou ding hi. Kei tuh tua bang khop a kikhekna pomsiam ka hita. Denchia Kuki leng pomtheihhuai ka hon sak khong di bang le tuh lauh om sim.

Thil hoihlou peuhmah thilhoih hong pianna ding a leihoih hithei a, tua hong hi mahmah leh ka chi hi. Tu a i Zomi sung a vuina leh phunnate makaite’n ki-etthakna in hon nei uhen la, dik leh tang a vaihawmna, angmasial hilou a nampi khual a vaihawmna, vaihawmna taktak hon pan le uh a lunggulhhuai mahmah hi. Amau ziak a Zomi kikeek a kigawm thei ahi chih haihlou in, michih damna di’n vai hon hawm le uh chih tuh genlouh a le kuapeuh lunggulh ahi. Tu a Zomi chih pum a pum zakdahte bang in leng den chia a deihpen uh a hong hihtheih hialna di'n pan hon la le uh maw! I laphuakte un leng kahla kia phuahphuah chimtak lawta ahihman un vualtungtuanna late leh kipahna late leng a hon phuah theihna ding un hun lem bawlsak sam ni.

Hichi bang vingveng kal ah malam a kum omte paltouh ding leng kithalawphuai hetlou a bang hi. Alehlam ah bel a taw dengkha i hih chiang in malam ah tuh ut leh utlou genlouh a khantouhlam manoh ding houh i hi ta di ua aw chihsim in a om a, kithalawpna tak khat bang a om lehlam hi. Hiai sa thuukzaw dengsuk lai ding i hihleh bel thutuam. Bang teng hileh ut leh utlouh a paltouh zel ding ahih chiah malam kumte paltou mahtak ni e. Ei a di’n bang koihkholh a na om hiam. Den chiang a ka kum sawmlite, ka kum sawmngate, chih gelh ding kithalawphuai di’n kum hong kihei mahmah heh ou.

Tuma kum zakhat lai vel a i pi-le-pute un lungbuaina (dilema) ana tuah bangbang uh tu in eite’ leng i tuak uhi. Christianity sahkhua pom ding maw nial ding? Sahkhua hilhial paihkhiat ding thil haksa ahi ngei ding a, nialna leh dalna tampi kawmkal ah a na pomzou khong uhi. Tu in i pi-le-pute’ thil lat vaangzou in khangtou kisa in i khom i nuam i sa uhi. A'ihleh kum hiaitan pusa biak i tawp nung, zuneek i tawp nung a huaite lunggulh a lungsim gim leh tawl kua a om a eita? Omlou hial. Huai lai ate’n a latkhiat uh (sacrifice) bangzahta a haksa hi ding hiam i suut ngei hiam? Tuitha lui a Dam a hon bawl dek lai un Tuitha lui in nial thei hileh hahtangpi a nial ding in ka um hi. 'Hon dangtankei un, bei ut naikei, luang ut lai ing,' chia kiphin ding in ummohhuai hi. Himahleh a hon dantan nung un a luan a khiamkei a, tua naksang in ama a sang a thupizaw a hong hi a, chikmah a mite' pahtawi ngeilouh tuh mite' pahtawi in a hong om a, gam gamla pipi apan a en ding in mi a hong kuan uhi. Pauthei hileh, 'Na hon dangtan dek ua ka utlouh hai ka hihlam tu in theikhia ing,' chi ding in gintakhuai hi. I latkhiat ding thilte a mantamdan leh latkhiat a haksatdan theilou i hikei. Hagawi kawm mah in pomsuk le hang den chiang a khang thumna khang linate’n hihhoih a hon sakna uh, pil a hon sakna uleh hampha a kisakna uh hong hi ding ahi. Huai chiang in tuh ‘I tun leh zua lung pil in,’ chih la a phuak ta ding uh. Deihteelna ei a ahi. Ahimhim in ei hun a sahkhua kheek di bang hi zenzen leh kua teng in i kheek ngam ding ua!

Ka chi vele maw. Thu pilhuailua gen di i hikei ka chih.